آخرین مطالب
امکانات وب
آمدن جناب جبرئیل بر بالین حضرت سیدالشهدا (علیه السلام)
نه گوردی که باشی اوسته سالوندی بیر سایه
سؤال قیلدی که ای قیدیمه قالان کیمسن
بو گونده سایه باشیم اوستونه سالان کیمسن
او سایه صاحبی ویردی جواب یا مولا
منم بو گونده سنه نوکر اولماقا اولا
او کیمسیم که بو عالمده خون دل یمیشم
گجه گونوز گَلوبَن لایلایوی دیمیشم
که ای اولان آدی عرش خدایه پیرایه
او کیمسیم ویروب الله منی سنه دایه
او کیمسیم که اطاعت بلینی باغلامیشام
بو دوغرانان بدنی سینم اوسته ساخلامیشام
اولیدی کاش گوزوم کور جبرئیلم من
بویوردی حضرت روح الامینه شاه امم
بو سایه سالماقوا بول یقین رضا دگولم
گوتور قانادیوی لازم دگول منه سایه
رواق عرشیده جدّیم دوروب تماشایه
گوتور قانادیوی قوی چشمه چشمه قان آخسون
آتام یارالاریما ساق عرشیدن باخسون
فغان ایدوب دیدی جبریل ای امیر عرب
بیان قیل اورگونده واروندی هر مطلب
بویوردی سرور حلّ و حرم امام قتیل
بو آرزودیَم ای پیک کردگار جلیل
یارالیم سوسوزام اود دوتور یانور جگریم
اولیدی کاش یانیمدا بو گونده شیعه لریم
گوریدیلر سو دیوب یانمیشام بو صحراده
سالیدیلار سو ایچن وقتیده منی یاده
ادبله عرض حضور ایتدی جبرئیل امین
نه چوخدی شیعه لره لطفون ای امام مبین
بویوردی کرب وبلانین شهید خون جگری
نه نوع ایستمیوم من وفالی شیعه لری
اولاردان اوتری علی اکبری گیندیردیم
اوزوم رکابینی دوتدوم عقابه میندیردیم
محرّم آیی اولاندا اولار دوتالار یاس
دلینده جام دیسونلر سبیل یا عبّاس
اولاردان اوتری بو حاله دوشوب یارالاندیم
فراته حسرتیله سو دیوب داخی یاندیم
دیردیم اونلاری گورسم باخون بو حالتیمه
چخاتمیون منی یاددان گلُون زیارتیمه
او حاله آغلادی روح الامین چکوب آهی
دیدی که ای بو چولون بی کفن قالان شاهی
سنه فدا من اولوم قوی بو جانیمه منّت
حواله ایله گیلن جبرئیله بیر خدمت
بویوردی روح الامینه عزیز ختم رُسُل
اگر بهارده گون دوشمسه آچلماز گل
دار فناده عمریمین آهر بهاریدور
بو سینم اوخ یارالارینین لاله زاریدور
قوی گون دگوب شکفته لنه غنچه یاره لر
هر لاله صدر سینه ده قان چشمه ساریدور
آخسون فرات تک یارامون قانی جبرئیل
بزم وصاله یتماقا جانان نثاریدور
مجروح صیده سایه ندور سایه بان ندور
سایَم زمین کرب و بلانین غباریدور
دورما خبر آپار آناما تیز یتور منه
حسرت گوزوم بو گونده اونون انتظاریدور
آغشته ایله قانیمیله پرّ و بالیوی
زهرایه عرض قیل بو حسین یادگاریدور
جدّیم پیمبره دی گیلن کربلایه گل
اوغلون بو چوللرون نجه گور بی مزاریدور
هر جان ویرنلرین باشی اوسته گلن علی
گلسون حسینینین بو دم احتضاریدور
«قمری» آچاندا اوج فصاحتده پرّ و بال
بیر دورینین تمام فصاحت شکاریدور
گدای درگه اهل بیت...برچسب : سیدالشهدا, نویسنده : yaabalhasana بازدید : 235